10 Affarijiet li għallmitni l-Arti tat-Tpinġija

THE ART OF PAINTING - JAN VERMEER

​10 AFFARIJIET LI GĦALLMITNI L-ARTI TAT-TPINĠIJA - SARAH BORG

Fija kont ħassejt ix-xewqa li nitgħallem l-arti tat-tpinġija. Ħafna qaluli, “l-arti ma twasslek imkien”, “mhux se taqla’ flus bit-tpinġija”. Nista’ ngħid li t-tpinġija għallmitni ħafna dwar il-ħajja. Il-lezzjonijiet li għallmitni forsi ma jrendulix flus, imma nista’ ngħid li servewni mitqlu deheb.

1. Meta nieħu żball, m’għandix inqatta’ l-karta biex nerġa’ nibda npinġi l-istampa mill-bidu. Għandi nuża l-abbiltà artistika tiegħi biex nirranġa l-iżball b’mod kreattiv. L-imħabba għat-tpinġija tgħinni negħleb il-biża’ u naċċessa l-kreattività ta’ ġo fija

Tant irrid kollox perfett u issa qabel għada, li jekk ma tiġinix żewġ mal-ewwel u eżatt kif ippjanajt jien, inkun irrid nwaqqaf kollox u niffoka fuq xi ħaġa ġdida. Il-ħajja qed tgħallimni nibqa’ nipprova, sforz wara sforz, ġurnata b’ġurnata. U jekk xi ħaġa tkun totalment impossibbli, dejjem nista’ niżviluppa mod ieħor kif inħares lejha. Jekk negħleb il-biża’ u r-reżistenza, nista’ naħseb b’mod kreattiv sabiex jekk ma nidħolx mill-bieb, jirnexxili nidħol mit-tieqa.

​2. Tpinġija waħda tista’ tiġi interpretata b’modi differenti

Dak li għalik huwa tqil u ikrah, għalija jista’ jkun faċli u interessanti. Meta kont nistudja u kont nisma’ lil xi ħadd jitkellem dwar xi eżami tqil li m’għaddiex minnu, kont neħodha ovvja li anke jien kont se nsibu tqil ħafna. Imma bdejt ninduna li dan mhux dejjem kien il-każ. Mhux għaqli li nħalli lil min jiskoraġġini ... dak li ħaddieħor ma setax jagħmel, forsi jien inkun kapaċi nsib tarfu.

3. Għandek bżonn għodda tajba biex il-proġett artistiku jkun ta’ ċertu kwalità: karti b’ċertu texture, pniezel b’daqsijiet differenti, kuluri varjati, media differenti...

Qed nagħraf li għandi bżonn għodod addattati biex il-proġett ta’ ħajti jkun ta’ valur. Fiżikament, għandi bżonn l-ikel, ix-xorb, l-eżerċizzju u l-irqad; emozzjonalment neħtieġ relazzjoni tajba ma’ ta’ madwari u li nirrikonoxxi l-emozzjonijiet tiegħi; psikoloġikament tgħinni stima tajba tiegħi nnifsi, sens ta’ sigurtà u attitudni pożittiva; filwaqt li fuq livell spiritwali għandi bżonn inkun fil-paċi miegħi nnifsi u f’konnessjoni mas-sors.

4. Minkejja li mogħnija bit-talent, għandi bżonn dixxiplina, prattika u lealtà lejn il-proċess

Minkejja li għandi l-ħajja, biex din tkun verament ta’ sugu, għandi niddixxiplina ruħi u nqatta’ ħin miegħi nnifsi biex nagħraf x’verament nixtieq f’ħajti. Meta l-azzjonijiet ta’ kuljum ikunu qed iqarrbuni dejjem iktar lejn il-ħolm tiegħi, inkun qed ngħix b’lealtà lejn dak li nixtieq minn ħajti, u hekk ħajti tkun tagħmel sens.

5. Ġieli ma nkunx nista’ npinġi dettall partikolari, allura jkolli nammetti li għadni ma ksibtx it-teknika meħtieġa u nirreferi għall-għalliem

Fil-ħajja hemm affarijiet li waħdi ma jirnexxilix nagħmilom. Qed nitgħallem nammetti miegħi nnifsi: “Din għadni ma nafx nagħmilha. Għandi bżonn l-għajnuna”. Ħafna drabi, jatrattawni quick fixes, però dawn ma jgħallmuni xejn. Qed nikkultiva l-umiltà biex nistaqsi għall-għajnuna mingħand persuni li naf li jriduli il-ġid, mhux biss bħall-familjari, il-partner, ħbieb u kollegi, imma anke mingħand persuni akkademiċi tar-ruħ jew professjonisti b’qalb tal-laħam li l-għerf tagħhom ġej ukoll mill-esperjenza tal-ħajja.

6. Kultant nieħu żball oħxon, u t-tentazzjoni tgħidli biex nibqa’ niffoka fuq dak l-iżball ikrah. Forsi jekk nagħti pinzellata oħra, l-iżball jitgħatta. Imma meta nkompli ngħawwar fuq dak id-dettall ikrah, iktar niġbed attenzjoni lejh u saħansitra ngħarraq il-karta

Min ma jiħux żbalji? Imma għawġ għalija meta nibqa’ niffoka fuq dak l-iżball li nkun għamilt. Ġieli ta’ madwari jinsew l-iżball tiegħi imma jien ma nkun nista’ naħfer lili nnifsi b’xejn. Dan l-aħħar qed nipprova nagħmel paċi mal-iżbalji tiegħi u qed nagħraf li meta ma nirreżistihomx jew ninnegahom, l-iżbalji dejjem jagħtuni lezzjonijiet ġodda u utli.

7. L-arti mhix irħisa. Tpinġija tiswa ħafna flus għax trid tkopri l-prezz tal-medium li ntuża kif ukoll il-ħin kollu investit f’taħriġ, tħejjija, tfassil, u tpinġija

Ħajti tiswa ħafna anke jekk mhux dejjem nemmen dan. Jien niswa ħafna għal dak kollu li sawwarni fil-bniedma li sirt illum.

8. Kultant l-arti tkun astratta. Ma jkollhiex sinifikat partikolari. Tkun qiegħda hemm biex tiġi apprezzata għal dak li hi

Ħajti mhux dejjem ħassejtha tagħmel sens. Għalfejn kelli nġarrab dik it-telfa? Għaliex din il-marda? Il-għala ma jistax ikolli dik il-ħaġa f’ħajti? Tweġibiet mhux dejjem sibt, imma dawn il-mistoqsijiet wassluni biex nagħraf li l-ħajja hi rigal u li xejn mhu tiegħi bi dritt. Kemm hu isbaħ meta nħares lejn dak li għandi minflok lejn dak li m’għandix.

9. L-arti tintuża għal għanijiet differenti: biex issebbaħ xi dar; biex twassal messaġġ; biex tqanqal; biex tfakkar; biex tiftaħlek għajnejk

Ħajti mhix tiegħi biss. Minkejja li tajjeb li ninvesti ħin biex nifhem aħjar lili nnifsi, qed nagħraf li nista’ nagħmel differenza bl-għażliet tiegħi. Għandi saħħa nagħmel differenza bil-mod ta’ kif nitratta lil ta’ madwari, anke lil dawk li ma jistgħu jrodduli xejn lura; bl-għażliet li nagħmel bħala konsumatriċi, b’kif nattwa bħala ċittadina u b’elf mod ieħor.

10.  Kultant tinxifli l-ispirazzjoni artistika. Imma meta terġa’ tiġini l-ispirazzjoni, napprezza l-artista ta’ ġo fija iktar u iktar

Fil-vjaġġ tal-ħajja, ġieli ħbadt negħja: ġieli għejejt nipprova; għejejt nittama; għejejt nemmen għax il-ħalel tal-ħajja tant qatgħuli nifsi li kien iebes għalija biex nibqa’ nżomm fil-wiċċ. Imma dawn il-mumenti mudlama servew biex jgħinuni napprezza s-sbuħija tal-fażijiet fejn ħajti kienet iktar imdawla, fejn irnexxieli nsib sens u skop fl-affarijiet sempliċi ta’ kuljum.

Sommarju ta’ Lezzjonijiet dwar il-Ħajja
Grazzi għal din l-arti, tgħallimt iktar dwar l-arti ta’ kif għandi ngħix il-ħajja. Tgħallimt nibqa’ nipprova jekk ma tiġinix żewġ mill-ewwel, u jekk ma jirnexxilix, inbiddel il-mod ta’ kif inħares lejn is-sitwazzjoni; tgħallimt li dak li ħaddieħor isib iebes, għalija forsi ma jkunx impossibbli; trawwimt f’kif nieħu ħsieb tal-aspetti kollha li jagħmluni min jien: ġismi, moħħi u ruħi. Lezzjoni oħra li tgħallimt hi li għandi niddixxiplina ruħi u ninvesti f’attivitajiet li jqarrbuni dejjem iktar lejn il-ħolm tiegħi. Imbagħad, meta niltaqa’ ma’ sitwazzjonijiet li ma nkunx naf nindirizzahom, tajjeb li nirreferi għall-għajnuna. Tgħallimt li l-iżbalji m’għandix nibqa’ nossessjona fuqhom u li minflok għandi nara x’nista’ nitgħallem minnhom, għax minkejja l-iżbalji tiegħi, ħajti tiswa’ ħafna, u ta’ min napprezza dak kollu li sawwarni fil-bniedma li sirt illum. Barra minn hekk, m’għandix ninħela fuq li nsib tweġiba għal kollox; isbaħ jekk naffaċċja l-ħajja bħala rigal u niffoka fuq dak li għandi minflok fuq dak li m’għandix. Fuqkollox inkun għaqlija jekk nieħu bis-serjetà l-irwol tiegħi bħala konsumatriċi, ċittadina u l-irwoli l-oħra li bihom għandi s-saħħa nagħmel differenza f’ħajjet ħaddieħor bl-għażliet tiegħi. Fl-aħħarnett, meta ngħaddi minn fażi ta’ dlam, dejjem qed infakkar lili nnifsi li l-ħajja eventwalment għad terġa’ toffrili mumenti ta’ dawl; li s-sema mhux se tibqa’ mudlama għal dejjem u li iktar ma tkun sewda s-sema, iktar l-istilel jibbrillaw bid-dawl.